GJKKO vijon gjyqin për Erion Veliajn, rrëzohet kërkesa për shtyrje

Në Gjykatën e Posaçme kundër Korrupsionit dhe Krimit të Organizuar (GJKKO) u zhvillua këtë të martë seanca e radhës në themel për kryebashkiakun e Tiranës, Erion Veliaj. Kryebashkiaku nuk ishte i pranishëm fizikisht, duke u përfaqësuar nga avokati i tij, Plarent Ndreca.

Përmes një deklarate, Veliaj njoftoi se ishte në dijeni për seancën, por zgjodhi të mos merrte pjesë, duke cituar si shkak mosvënien në dispozicion të 24 fashikujve të dosjes dhe provave digjitale. Gjithashtu, ai kundërshtoi mbajtjen e tij në të ashtuquajturin "kafaz xhami", duke kërkuar pjesëmarrjen në proces si njeri i lirë.

Avokati Ndreca sqaroi përpara trupit gjykues se sekretaria gjyqësore kishte njoftuar për dorëzimin e akteve në orët e vona të një dite më parë, rreth orës 15:30. Ai argumentoi se kërkohej kohë shtesë që klienti i tij të njihej me këto materiale për të garantuar një mbrojtje efektive.

Nga ana tjetër, prokurori i çështjes Ols Dado kundërshtoi kërkesën për shtyrje. Sipas prokurorisë, materialet procedurale u përkasin të pandehurve të tjerë dhe episodeve të veçanta, ndaj nuk përbëjnë pengesë për vazhdimin e gjykimit. Trupi gjykues vendosi vijimin e seancës, me argumentin se vënia në dispozicion e akteve të kërkuara nuk përbën shkak për ndërprerjen ose shtyrjen e procesit.

Kjo çështje është ndarë në dy fraksione që prej datës 27 prill, pasi gjykata pranoi kërkesat e 11 të pandehurve të tjerë për gjykim të veçuar, mes të cilëve biznesmeni Elman Abule dhe ish-deputetja Klotilda Bushka. Seancat e këtij procesi gjyqësor janë parashikuar të zhvillohen çdo të martë në orën 10:00.