Procesi gjyqësor ndaj ish-ministrit të Mbrojtjes, Fatmir Mediu, vijoi këtë të martë në Gjykatën e Posaçme të Shkallës së Parë për Korrupsionin dhe Krimin e Organizuar (GJKKO). I pandehuri nuk ishte i pranishëm në sallë për shkak të angazhimeve institucionale, duke u përfaqësuar nga avokatët Henrik Ligori dhe Ardian Visha.
Gjatë seancës, mbrojtja kundërshtoi akuzat e ngritura nga SPAK për veprën penale "shpërdorim detyre" në dy raste. Sipas avokatëve, nuk ekziston asnjë veprim individual i ish-ministrit që të provojë përgjegjësinë e tij penale. Mbrojtja e cilësoi si arbitrar transferimin e përgjegjësive të hallkave tekniko-administrative të Shtabit të Përgjithshëm, komandave dhe ndërmarrjes MEICO drejt institucionit të Ministrisë së Mbrojtjes.
Avokatët theksuan se pretendimet e prokurorisë nuk mbështeten në asnjë bazë faktike të provuar. Trupi gjykues vendosi që seanca e radhës të mbahet më 16 qershor, ku ish-ministri pritet të vijojë me paraqitjen e kundërshtimeve të tij.