Gjykata e Posaçme kundër Korrupsionit dhe Krimit të Organizuar (GJKKO) pritet të shqyrtojë kërkesën e kryebashkiakut të Tiranës, Erion Veliaj, në lidhje me identifikimin dhe hetimin penal të Nesti Angonit. Ky është personazhi anonim mbi një dokument të të cilit SPAK ka nisur hetimet ndaj Veliajt.
Në prill të vitit 2026, Veliaj depozitoi një kallëzim në Prokurorinë e Tiranës, duke kërkuar identifikimin e personit real pas këtij identiteti dhe duke pretenduar për falsifikim dokumentesh. Gjithashtu, ai kërkoi verifikimin e mënyrës se si është administruar kallëzimi i këtij personazhi në SPAK. Prokuroria e Tiranës vendosi mosfillimin e procedimit penal, me arsyetimin se Nesti Angoni nuk figuron në regjistrin e Gjendjes Civile dhe se organi i akuzës nuk ka kompetencë ligjore për të kontrolluar hetimet e SPAK.
Vendimi i prokurorisë u ankimua nga Veliaj në Gjykatën e Tiranës, e cila më 15 korrik 2026 shpalli moskompetencën dhe urdhëroi dërgimin e çështjes për shqyrtim në GJKKO. Dosja tashmë ndodhet në duart e gjyqtarit Erjon Çela, i cili pritet të caktojë datën e seancës së parë gjyqësore.