Ministri i Punëve të Brendshme, Besfort Lamallari, reagoi ditën e sotme pas një incidenti të regjistruar në plazhin e Shëngjinit, ku një mjet lundrues, konkretisht një Jet Car, hyri përtej perimetrit të lejuar të sigurisë. Ky veprim vuri në rrezik jetën dhe shëndetin e pushuesve që ndodheshin në zonë.
Sipas njoftimit zyrtar, ndaj drejtuesit të mjetit janë marrë masa të menjëhershme administrative. Përveç gjobës në vlerën 500 mijë lekë të reja, autoritetet kanë bërë edhe bllokimin e mjetit lundrues. Ministri Lamallari theksoi se hapësirat bregdetare janë të dedikuara për familjet dhe pushuesit, duke paralajmëruar se nuk do të ketë tolerancë për ata që sfidojnë ligjin dhe cenojnë sigurinë e qytetarëve.
“Plazhet tona janë për familjet dhe pushuesit, jo për aventurierët që luajnë me jetën e të tjerëve. Kush sfidon ligjin dhe vë në rrezik shëndetin dhe jetën e turistëve për aventurat e tij, do të përballet me pasojat pa asnjë tolerancë dhe vonesë. Nuk do të ketë as paralajmërime, as justifikime”, deklaroi ministri përmes një reagimi publik. Ai nënvizoi se siguria e pushuesve mbetet përparësi dhe nuk mund të jetë objekt kompromisi.
Në vijim të deklaratës së tij, Besfort Lamallari njoftoi se kontrollet e institucioneve ligjzbatuese do të jenë intensive përgjatë gjithë sezonit turistik në të gjitha zonat bregdetare të vendit. Ministri shprehu gjithashtu mirënjohje për qytetarët që denoncojnë raste të tilla, si dhe për rolin e mediave në evidentimin e shkeljeve, duke e cilësuar këtë bashkëpunim si të rëndësishëm për garantimin e rendit dhe qetësisë në zonat turistike.