Në sheshin Skënderbej në Tiranë është zhvilluar dita e 39-të e protestave kundër klasës politike në vend. Protestuesit, të cilët mbanin pankarta dhe simbole kombëtare, marshuan drejt Kryeministrisë duke kërkuar dorëheqjen e kryeministrit Edi Rama dhe kryedemokratit Sali Berisha.
Gjatë fjalës së tij, organizatori Arben Kola ka ashpërsuar retorikën, duke bërë thirrje të paprecedenta. Kola u shpreh se shpreson që kryeministri të hidhet nga tarraca e Kryeministrisë ditën e nesërme, e cila përkon me ditën e 40-të të tubimeve, duke shtuar në mënyrë provokuese: "Mbase nesër, që janë të 40-at, ja hamë edhe hallvën dhe të shpëtojmë".
Në të njëjtën kohë, Arben Kola u kërkoi qytetarëve të bojkotojnë koncertin e këngëtarit Kanye West, që pritet të mbahet më 11 korrik në kryeqytet. Sipas tij, ky bojkot duhet të shërbejë për "të prishur algoritmin" si pjesë e protestës ndaj qëndrimeve të qeverisë.