Kryetari i Bashkisë së Tiranës, Erion Veliaj, ka reaguar pas vendimit të Gjykatës Administrative, e cila nuk pranoi të marrë në shqyrtim kërkesën e tij për verifikimin e ligjshmërisë së emërimit të prokurorit Ols Dado. Përmes një reagimi publik, Veliaj theksoi se padia nuk është rrëzuar në themel, por nuk është lejuar të shqyrtohet për arsye procedurale.
Sipas vendimit të gjykatës, Bashkia e Tiranës dhe kryetari i saj nuk gëzojnë interes të ligjshëm për të kërkuar kontrollin e emërimit të një funksionari shtetëror. Në qëndrimin e tij, të mbështetur edhe nga avokati Plarent Ndreca, kryebashkiaku e cilësoi këtë argumentim si një mohim të aksesit efektiv në gjykatë.
Veliaj ngriti shqetësimin se një standard i tillë juridik do të pamundësonte verifikimin e atributeve të punonjësve të shtetit nga qytetarët, ndaj të cilëve ushtrohen masa shtrënguese si përgjime, kontrolle, sekuestrime apo kufizime të lirisë personale.
“Nëse nuk legjitimohet qytetari që pretendon se këto masa janë marrë nga një person pa atributet ligjore, atëherë praktikisht nuk legjitimohet askush”, deklaroi ai. Kryebashkiaku theksoi se çështja e emërimit të prokurorit Ols Dado në përputhje me Kushtetutën mbetet me rëndësi publike dhe procesi do të vijojë me të gjitha mjetet ligjore.
Përditësime
Avokati Plarent Ndreca akuzoi prokurorin Ols Dado se nuk ka paraqitur prova mbi ligjshmërinë e emërimit të tij gjatë procesit gjyqësor. Ndreca e cilësoi vendimin e Gjykatës Administrative si dështim të sistemit të drejtësisë. Nga ana tjetër, ekipi ligjor i Erion Veliajt bëri të ditur se do ta apelojë vendimin menjëherë pas zbardhjes së tij.