Seanca gjyqësore në Gjykatën Administrative, ku kryetari i Bashkisë së Tiranës, Erion Veliaj, ka paditur prokurorin e Posaçëm Ols Dado, u shty këtë të premte. Vendimi u mor nga gjyqtari i çështjes për shkak të mungesës së avokatit mbrojtës të Veliajt, Plarent Ndreca, i cili nuk u paraqit për arsye familjare. Kryebashkiaku deklaroi para trupit gjykues se e kishte të pamundur vazhdimin e seancës pa asistencën ligjore.
Nëpërmjet kësaj padie, Erion Veliaj kërkon shfuqizimin e dekretit të presidentit për emërimin e Ols Dados në detyrën e prokurorit, duke pretenduar se procesi i emërimit është kryer në shkelje të ligjit. Paralelisht, Veliaj përballet me një proces tjetër në Gjykatën e Posaçme, ku akuzohet për 13 vepra penale.
Gjatë seancës, Veliaj vuri në dispozicion të gjykatës vendimin e zbardhur të Gjykatës Kushtetuese, duke u shprehur se ky dokument ka rëndësi të drejtpërdrejtë për procesin administrativ. Sipas tij, vendimi konstaton se Gjykata e Lartë nuk ka arsyetuar në mënyrë kushtetuese proporcionalitetin e masës së paraburgimit në raport me mandatin e tij si kryetar bashkie dhe nuk ka trajtuar si duhet pretendimet për cenimin e dinjitetit gjatë mbajtjes në kabinën e xhamit. Po ashtu, Veliaj citoi se një prej gjyqtarëve të Gjykatës Kushtetuese ka arritur në përfundimin se ndaj tij nuk rezulton të jetë arritur standardi kushtetues i dyshimit të arsyeshëm për kryerjen e veprave penale.
Përditësime
Gjykata ka shtyrë seancën ndaj Ols Dados për më 3 korrik. Në lidhje me këtë proces, kryetari i Bashkisë së Tiranës, Erion Veliaj, theksoi se zbatimi i vendimeve të Gjykatës Kushtetuese është thelbësor për forcimin e shtetit të së drejtës.