Erion Veliaj, kryetar i Bashkisë së Tiranës, mori pjesë këtë të premte, më 3 prill 2026, në seancën e Gjykatës Administrative, ku shqyrtohet padia e tij për shpalljen të pavlefshme të emërimit të Olsi Dado si prokuror. Veliaj pretendon se emërimi i Dado është bërë në kundërshtim me ligjin, pasi ai nuk ka plotësuar kriteret e nevojshme ligjore në momentin e emërimit.
Gjatë dëshmisë para gjyqtarit Hazbi Balliu, Veliaj deklaroi se nuk ndodhet në gjykatë për arsye personale apo dramën familjare, por për interesin publik dhe dëmin e shkaktuar Bashkisë së Tiranës. Ai pretendoi konflikt interesi me Dado, duke thënë se ky i fundit ka kërkuar leje ndërtimi duke përdorur telefonin e prokurorisë dhe ka vizituar shpesh bashkinë, jo vetëm për interesat personale. Veliaj shtoi se vënia në detyrë e personave pa kriteret e duhura ka sjellë pasoja të rënda për bashkinë.
Veliaj dyshoi ekzistencën e Nesti Angonit, personit që e ka kallëzuar për çështjen e inceneratorëve menjëherë pas zgjedhjeve të korrikut, me shtyrje të regjistrimit prej 7 muajsh, kur afati është 15 ditë. Ai përmendi se ka fituar një gjyq për shpifje një ditë më parë dhe se situata është pjesë e një intrige. Gjithashtu, ai pyeti se cili është dëmi që i ka shkaktuar Tiranës, duke përmendur ndërtimin e 100 çerdheve, 50 shkolleve dhe mbjelljen e pemëve.
Gjyqtari Hazbi Balliu i kërkoi Veliajt të fokusohej te objekti i padisë, duke thënë se gjykata orientohet te procesi. Veliaj theksoi se arrestimi i tij ka ndaluar punët e bashkisë: prej 14 muajsh nuk është hapur kopsht i ri, ndonëse ditën e arrestimit inauguronte një në Kashar; plehrat mbeten në rrugë dhe nuk firmos më dokumente të lidhura me Dado.
Avokati i Veliajt përmendi një vendim të Gjykatës Kushtetuese për rikthimin e tij në detyrë, por që nuk zbatohet për shkak të masës së kërkuar nga Dado.