Gjykata e Tiranës ka vendosur lirimin nga qelia të 33-vjeçarit Erald Heqimaj, i cili u arrestua pas përplasjeve të ndodhura mbrëmjen e 4 korrikut pranë Komisariatit nr. 3. Vendimi për caktimin e masës "detyrim paraqitje" u mor pas kërkesës së Prokurorisë, e cila vlerësoi provat dhe faktin se i riu nuk rezulton me precedentë penalë.
Sipas hetimeve, Heqimaj dyshohet për veprat penale: "shkatërrimi i pronës", "prishja e rendit dhe e qetësisë publike", "organizimi dhe pjesëmarrja në grumbullime të paligjshme" dhe "kundërshtimi i punonjësit të policisë". Në dëshminë e tij, i riu deklaroi se veprimet ishin pasojë e ndikimit nga atmosfera e protestës së 35-të, e cila kërkonte lirimin e personave të ndaluar më herët gjatë përplasjeve tek parlamenti.
Ndërkohë, autoritetet policore vazhdojnë hetimet për identifikimin e personave të tjerë të përfshirë. Përveç Heqimajt, policia ka identifikuar 11 persona të tjerë, nga të cilët 7 shtetas po hetohen në gjendje të lirë, ndërsa 4 të tjerë janë shpallur në kërkim. Gjykata theksoi se hetimet janë në zhvillim e sipër dhe për këtë arsye nuk mund të jepen detaje të mëtejshme, duke iu referuar sekretit hetimor.