Gjykata e Shkallës së Parë Tiranë ka shpallur fajtor Isuf Hasën për veprën penale të vjedhjes me pasojë vdekjen, duke e dënuar atë me 25 vite burgim. Vendimi u mor më 10 dhjetor 2025, me vuajtje të dënimit duke filluar nga data e ndalimit të tij, 15 janar 2025, në një burg të sigurisë së lartë. Ngjarja ndodhi më 13 janar 2025 në fshatin Shëngjergj të Tiranës, ku Hasa, 64-vjeçar, goditi me çekiç pas kokës Xhemal Metën, 81-vjeçar, duke i shkaktuar vdekjen nga dëmtime të rënda në kokë.
Sipas hetimeve, Hasa dhe Meta ishin miq dhe fqinjë prej vitesh dhe jetonin në të njëjtin fshat. Ata kishin pirë kafe së bashku në banesën e viktimës, siç ishte zakoni i tyre i përditshëm, para se të dilnin për të shkuar drejt Tiranës ose në një lokal të fshatit. Në oborrin e banesës, Hasa pa dhe mori një çekiç, me të cilin goditi viktimën. Pas krimit, ai i mori paratë që Meta mbante me vete dhe i fshehu bashkë me mjetin e krimit në banesën e vajzës së tij në Vorë. Trupi i pajetë u gjet nga familjarët në oborrin e banesës, të cilët fillimisht dyshuan për një aksident, por ekspertiza mjeko-ligjore konfirmoi shenja dhune nga sende të forta.
Hetimet zbuluan se Meta mbante gjithmonë një sasi parash me vete, fakt të njohur nga Hasa. Gjatë marrjes në pyetje, Hasa pranoi krimin dhe shpjegoi motivin kryesor si vjedhje, duke thënë se e dinte për paratë. Megjithatë, ai pretendoi gjithashtu motive personale, duke akuzuar viktimën se e ngacmonte gruan e tij dhe e ofendonte shpesh për mungesën e tij në shtëpi për shkak të punës si roje nate në Dajt. Prokuroria e pyeti dhe ripyeti Hasën, i cili theksoi mllefin e akumuluar prej kohësh, por gjykata e cilësoi fajtor kryesisht për vjedhje me pasojë vdekjen, sipas nenit 141 të Kodit Penal.
Gjykata urdhëroi kthimin e kartëmonedhave të sekuestruara te pronari i ligjshëm dhe kalimin e sendeve të tjera në favor të shtetit. Shpenzimet procedurale dhe gjyqësore i ngarkohen të pandehurit, ndërsa ato për mbrojtësen e caktuar paguhen nga shteti. Kundër vendimit mund të bëhet ankim në Gjykatën e Apelit brenda 15 ditëve nga njoftimi.