Gjykata Penale e Athinës dha vendimin për 39-vjeçarin Kastriot Cenko, i akuzuar për vrasjen me dashje të bashkëshortes së tij, 32-vjeçares Alba Cenko. Ngjarja e rëndë ndodhi më 29 nëntor 2024 në zonën Ampelokipi të Athinës.
Sipas dosjes hetimore, autori e goditi viktimën me çekiç dhe më pas e mbyti me kabllon e një karikuesi celular. Pas krimit, Kastriot Cenko e fshehu trupin e viktimës në papafingo për një javë. Gjatë kësaj kohe, ai përdori celularin e bashkëshortes për të dërguar mesazhe, duke mashtruar familjarët dhe fëmijët e tyre të mitur me pretendimin se ajo ishte larguar jashtë vendit për punë.
Gjatë procesit gjyqësor, prokuroria e cilësoi të pandehurin si person që ka vepruar me gjakftohtësi dhe paramendim, duke hedhur poshtë pretendimin e mbrojtjes se krimi ndodhi në gjendje të rënduar emocionale pas një debati për çështje familjare dhe atësinë e fëmijëve. Një prej anëtarëve të trupit gjykues shprehu mendimin se krimi ishte kryer në gjendje shpërthimi emocional, por kjo pikëpamje nuk u mbështet nga shumica e gjyqtarëve. Përveç dënimit me burgim të përjetshëm, gjykata vendosi edhe një dënim prej 2 vjetësh e 6 muajsh për armëmbajtje pa leje.
Përditësime
Gjatë seancës gjyqësore në Athinë, 39-vjeçari shqiptar u dënua me burgim të përjetshëm për vrasjen e bashkëjetueses. I pandehuri, me profesion ndërtues, pranoi krimin dhe dëshmoi se veproi në gjendje të rënduar psikologjike, pas dyshimeve për atësinë e fëmijës dhe debateve me viktimën. Ai pohoi se e kishte mbajtur trupin e viktimës të fshehur për 5 ditë dhe pretendoi se kishte tentuar t'i ofronte ndihmë pas goditjes fatale me çekiç.
Gjykata e Athinës dënoi me burgim të përjetshëm 39-vjeçarin shqiptar, punëtor ndërtimi, pasi u vërtetua se kreu vrasjen pas një konflikti të çastit, i nxitur nga dyshimet se viktima e tradhtonte me një shok të tij.