Gjykata e Shkallës së Parë e Juridiksionit të Përgjithshëm Gjirokastër ka caktuar masën e sigurisë "arrest me burg" për shtetasin Kelmend Kursa, i dyshuar për kryerjen e veprës penale "marrëdhënie seksuale ose homoseksuale me të mitur", të parashikuar nga neni 100/2 i Kodit Penal.
Vendimi u mor më 28 janar 2026, gjatë seancës gjyqësore të zhvilluar në orën 14:00. Trupi gjykues, i kryesuar nga gjyqtarja Orinda Lloshi, pranoi kërkesën e Prokurorisë pranë Gjykatës së Gjirokastrës, duke vlerësuar si të ligjshëm arrestimin në flagrancë dhe caktimin e masës shtrënguese "arrest në burg", sipas nenit 238 të Kodit të Procedurës Penale.
Kelmend Kursa akuzohet se ka pasur marrëdhënie seksuale me vajzën 12-vjeçare të partneres së tij. Ai konsiderohet bashkëjetuesi i nënës së të miturës.
Nëna e vajzës kishte denoncuar më parë dyshimet për ngacmim seksual nga ana e bashkëjetuesit. Sipas të dhënave, Kursa dyshohet gjithashtu për vrasjen e babait të së miturës, para se të lidhej me nënën e saj.
Hetimet vazhdojnë dhe i dyshuari nuk e ka pranuar akuzën.