Gjykata e Lartë Federale e Brazilit ka vendosur të mbajë në fuqi masën e arrestit parandalues ndaj shtetasit shqiptar Ervin Mata, duke rrëzuar kërkesën e avokatëve mbrojtës për heqjen e arrestit ose zëvendësimin e tij me masa të tjera shtrënguese. Vendimi u zbardh në lidhje me çështjen e ekstradimit nr. 1.925.
Sipas vendimit të marrë më 21 korrik 2026 nga ministri Alexandre de Moraes, arresti parandalues është një masë thelbësore për të garantuar që personi i kërkuar të mbetet në dispozicion të autoriteteve deri në përfundim të procesit. Gjykata theksoi se nuk ekzistojnë rrethana të jashtëzakonshme që do të përligjnin lirimin, duke përmendur gjithashtu rrezikun e largimit të të kërkuarit.
Autoritetet shqiptare kërkojnë ekstradimin e Ervin Matës për t'u përballur me akuza që përfshijnë:
- trafikun e lëndëve narkotike;
- kryerjen e veprave penale në kuadër të organizatës kriminale;
- pjesëmarrjen në grup të strukturuar kriminal.
Avokatët mbrojtës pretenduan se shteti shqiptar nuk kishte respektuar afatet ligjore për formalizimin e kërkesës për ekstradim dhe kërkuan shqyrtimin e çështjeve të juridiksionit. Megjithatë, Gjykata e Lartë braziliane konstatoi se kërkesa zyrtare ishte protokolluar më 7 mars 2025 dhe ishte rikonfirmuar përmes Notës Verbale nr. 46/2026 të Ambasadës së Republikës së Shqipërisë më 2 korrik 2026. Prokuroria e Përgjithshme e Brazilit kishte shprehur gjithashtu qëndrim në favor të pranimit të kërkesës për ekstradim.
Masa e arrestit parandalues ndaj Ervin Matës ishte caktuar fillimisht më 11 mars 2025, ndërsa ekzekutimi i këtij arrestimi nga Policia Federale braziliane u krye më 25 prill 2026. Gjykata sqaroi se ky vendim ka të bëjë ekskluzivisht me aspektet procedurale të procesit të ekstradimit dhe nuk përbën një vlerësim mbi fajësinë apo pafajësinë e shtetasit shqiptar për akuzat e ngritura.
Përditësime
Autoritetet braziliane konfirmuan arrestimin e Ervin Matës në Ilha Bela, i cili u kap me dokumente identifikimi angleze të falsifikuara, të pajisura me afat skadence deri në vitin 2030. Gjykata e Lartë Federale e Brazilit rrëzoi kërkesën e mbrojtjes për verifikime shtesë mbi kompetencën juridike të Shqipërisë dhe hetimet paralele në Gjermani. Mata është pjesë e dosjes hetimore të SPAK të vitit 2023, ku akuzohet përkrah Erzen Breçanit për organizimin e trafikut të 250 kg kokainë.