Gjykata e Shkodrës përfundoi seancën për caktimin e masës së sigurisë ndaj tre personave të përfshirë në konfliktin e ndodhur më 16 korrik në ambientet e poliklinikës së qytetit. Trupi gjykues, i kryesuar nga gjyqtarja Arta Llazani, vendosi masën "arrest shtëpie" për Arvin Fregjajn (18 vjeç) dhe babanë e tij, Agron Mehmetin (41 vjeç), si dhe për Arben Kepëcën (41 vjeç).
Gjatë seancës, ku morën pjesë prokurori Ndriçim Halilaj dhe mbrojtësit ligjorë Bruno Pepa e Besmir Vukaj, gjykata rrëzoi akuzën për "vrasje në tentativë". Sipas vendimit, provat e paraqitura në këtë fazë të hetimit nuk konfirmuan se 18-vjeçari Arvin Fregjaj kishte përdorur apo mbante mjet prerës gjatë përplasjes fizike me të dëmtuarin Vildan Kepëca.
Sipas deklarimeve në sallën e gjyqit, të pandehurit shprehën pendesë për ngjarjen, duke e cilësuar atë si një konflikt të çastit të shkaktuar nga gjaknxehtësia. Nga ana tjetër, Arben Kepëca, i cili është vëllai i të plagosurit, vijon të përballet me akuzën për "armëmbajtje pa leje". Ai u arrestua nga shërbimet e Policisë së Shkodrës pasi u kap me një pistoletë gjatë përpjekjes për t'u larguar nga vendi i ngjarjes, armë e cila u sekuestrua në cilësinë e provës materiale.
Hetimet për zbardhjen e plotë të rrethanave të këtij konflikti, i cili u parandalua nga ndërhyrja e forcave të rendit përpara përshkallëzimit të mëtejshëm, mbeten në proces.