Një ngjarje e rëndë ka ndodhur paraditen e së mërkurës në ambientet e një poliklinike në lagjen "Vasil Shanto" në Shkodër. Rreth orës 11:30, pas një konflikti për motive të dobëta, shtetasi Arvin Fregjaj, 18 vjeç, dyshohet se ka plagosur me mjet prerës (thikë) shtetasin Vildan Kepëca, 32 vjeç. I dëmtuari është transportuar në Spitalin Rajonal të Shkodrës, ku ndodhet nën kujdesin e mjekëve, jashtë rrezikut për jetën.
Menjëherë pas njoftimit për ngjarjen, shërbimet e Policisë kanë ndërmarrë veprime të shpejta. Gjatë rrugës për në vendngjarje, uniformat blu janë njoftuar se vëllai i të plagosurit, Arben Kepëca, 41 vjeç, kishte marrë një armë zjarri pistoletë, me fishek në fole, dhe ishte nisur për të gjetur dhe vrarë autorin e dyshuar.
Policia ka ndërhyrë në kohë, duke parandaluar përshkallëzimin e konfliktit. Gjatë operacionit, 41-vjeçari ka tentuar të largohet dhe ka hedhur armën e zjarrit, por është neutralizuar dhe arrestuar në flagrancë nga efektivët. Arma e zjarrit, së bashku me municionin luftarak, është sekuestruar në cilësinë e provës materiale.
Ndërkohë, Policia e Shtetit dhe grupi hetimor, nën drejtimin e Prokurorisë, po vijojnë punën për lokalizimin dhe kapjen e 18-vjeçarit Arvin Fregjaj. Hetimet për zbardhjen e plotë të rrethanave të ngjarjes mbeten të hapura.
Përditësime
Prokuroria e Shkodrës ka njoftuar zhvillime të reja në hetimin e plagosjes së ndodhur pas një konflikti për radhën në poliklinikë:
- Agron Mehmeti, 53 vjeç, është arrestuar si bashkëpunëtor në këtë ngjarje.
- Prokuroria ka zyrtarizuar akuzat penale ndaj autorit dhe babait të tij, Agron Mehmeti.
- Hetuesit kanë publikuar pamjet filmike të ngjarjes, të cilat janë sekuestruar si provë materiale.