Gjykata e Shkallës së Parë në Shkodër vendosi masën “arrest me burg” për shtetasin Prel Gjoni, pronar i rrjetit të marketeve “Xhedis”. Vendimi u mor pas seancës ku Gjoni doli për t’u njohur me masën e sigurisë.
Ngjarja ka ndodhur disa ditë më parë. Gazetari Ervin Dushi kishte publikuar një video në TikTok ku denonconte shitjen e ushqimeve të skaduara. Sipas Dushit, ai mori një telefonatë nga Gjoni dhe më pas u sulmua nga tre persona, duke përfshirë pronarin, të cilët i shkaktuan dëmtime në fytyrë dhe kokë.
Para gjykatës, Prel Gjoni mohoi se e ka goditur gazetarin dhe deklaroi se vetëm e ka shtyrë. Megjithatë, prokuroria e Shkodrës kërkoi “arrest me burg” dhe gjykata pranoi kërkesën. Policia e ka arrestuar Gjonin për veprën penale “goditje për shkak të detyrës”.
Prokuroria vijon hetimet për të zbardhur të gjitha rrethanat e incidentit.