Policia e Durrësit, në bashkëpunim me ato të Shkodrës, Pogradecit dhe Korçës, ka arrestuar dy persona të shpallur në kërkim gjatë operacionit policor të koduar "Koordinimi". Ngjarja ka ndodhur më 11 janar 2026 në Durrës dhe Pogradec.
Shtetasi T.B., 39 vjeç, banues në Shkodër, u arrestua për veprën penale "Shpërdorim detyre". Gjykata e Durrësit, më 31 korrik 2025, i ka caktuar masën e sigurisë "Arrest në burg". Kapja e tij u bë nga specialistët për Hetimin e Krimeve të Komisariatit të Policisë Durrës, në bashkëpunim me ata të Shkodrës, bazuar në informacione operative.
Shtetasi A.K., 31 vjeç, banues në Durrës, u arrestua për veprën penale "Largimi i të burgosurit nga vendi i qëndrimit", pasi kishte thyer masën e sigurisë "Arrest në shtëpi", të caktuar për veprën penale "Mashtrim". Kapja e tij u realizua në bashkëpunim me specialistët për Hetimin e Krimeve të Komisariatit të Policisë Pogradec.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme. Operacioni pasoi punë intensive për kapjen e personave në kërkim.
Përditësime
Taulant Bejko dhe Artmirnejdi Kasaj janë emrat e plotë të dy personave të arrestuar në Durrës për mashtrim dhe shpërdorim detyre, sipas Policisë së Shtetit. Taulant Bejko është jurist.