Në Gjykatën e Tiranës ka vijuar sot seanca për shqyrtimin e masave të sigurisë ndaj personave të arrestuar gjatë protestës së datës 2 korrik. Pas tërheqjes së trupës gjykuese në dhomën e këshillimit, përfaqësuesit ligjorë të të arrestuarve kanë dhënë prononcime për mediat.
Avokatët mbrojtës deklaruan se kanë kërkuar unanimisht shpalljen e arrestimeve si të paligjshme, duke argumentuar se procedurat e ndjekura nuk përputhen me ligjin. Nga ana tjetër, përfaqësuesit e Prokurorisë paraqitën kërkesat e tyre për masat e sigurisë. Për 2 prej të arrestuarve, akuza ka kërkuar masën e sigurisë arrest me burg, ndërsa për pjesën tjetër të protestuesve është kërkuar masa e detyrimit të paraqitjes.
Aktualisht, pritet që gjykata të shpallë vendimin përfundimtar mbi këto kërkesa pas përfundimit të shqyrtimit.
Përditësime
Gjykata e Tiranës caktoi sot masat e sigurisë për 21 protestuesit e ndaluar pas protestës së 2 korrikut. Vendimi përfshin dy persona në "arrest shtëpie", ndërsa 14 të tjerë mbeten nën masën "detyrim paraqitje". Pesë protestues të tjerë u liruan pa asnjë masë shtrënguese. Prokuroria ka ngritur pesë akuza: kundërshtim i punonjësit të policisë, shkatërrim prone, prishje e qetësisë publike, organizim i tubimit të paligjshëm dhe bllokim i transportit. Megjithë pretendimet e mbrojtjes për dhunë policore, gjykata e vlerësoi ligjshëm ndalimin e tyre. Përpara godinës së gjykatës vijon tubimi i mbështetësve të tyre.