Në Gjykatën e Tiranës zhvillohet sot seanca për caktimin e masës së sigurisë ndaj Artemisa Islamajt dhe Orion Peçit, dy personave të arrestuar pas përplasjeve të dhunshme në protestën e së enjtes përpara godinës së Parlamentit. Ndaj të arrestuarve rëndojnë gjithsej 6 akuza penale, të cilat variojnë nga organizimi i tubimeve të paligjshme e deri te goditja për shkak të detyrës ndaj punonjësve të policisë.
Sipas hetimeve, autoritetet kanë administruar prova materiale që përfshijnë të dy të arrestuarit në akte dhune dhe në furnizimin me mjete piroteknike. Artemisa Islamaj dyshohet se ka siguruar dhe shpërndarë kapsolla për pjesëmarrësit e tjerë në protestë. Nga ana tjetër, Orion Peçi është identifikuar si autor i dyshuar i dëmtimit të një efektivi të forcave “Shqiponja”. Sipas dinamikës së hetuar, i dyshuari ka vendosur një kapsollë brenda një shisheje plastike, të cilën më pas e ka hedhur në drejtim të policit.
Krahas dy të arrestuarve kryesorë, autoritetet kanë shoqëruar për marrje në pyetje rreth 30 protestues të tjerë, të cilët pas verifikimeve janë lënë të lirë. Në mesin e të shoqëruarve ishin edhe emra të njohur për pjesëmarrje në tubime të mëparshme, si Dritan Goxhaj dhe Edison Lika, ky i fundit një ndër figurat aktive në protestën e njohur si “Revolucioni Flamingo”. Të gjithë personat e shoqëruar, me përjashtim të dy të dyshuarve kryesorë, janë lënë të lirë pas disa orësh në komisariatet e Tiranës.
Sipas legjislacionit në fuqi, çdo person gëzon prezumimin e pafajësisë deri në një vendim përfundimtar të formës së prerë nga organet e drejtësisë.