Gjykata e Posaçme kundër Korrupsionit dhe Krimit të Organizuar ka pranuar kërkesën e prokurorit Adnan Xholi dhe ka vendosur kalimin për gjykim të çështjes penale në ngarkim të Amar Shkëmbit dhe Bledar Polivinës, të dyshuar për përfshirje në atentatin ndaj ish-prokurorit Arjan Ndoja. Vendimi u mor më 13 janar 2026 nga gjyqtari Bib Ndreca, ndërsa në ditët në vijim do të hidhet shorti për përcaktimin e trupës gjykuese prej tre gjyqtarësh që do të shqyrtojë dosjen në themel.
Amar Shkëmbi ishte shpallur në kërkim nga Struktura e Posaçme Kundër Korrupsionit dhe Krimit të Organizuar (SPAK) për këtë ngjarje dhe u ekstradua nga Dubai në Tiranë në tetor të vitit 2025. Sipas hetimeve të Prokurorisë së Posaçme, Shkëmbi dhe Polivina, së bashku me Plaurent Dervishaj, Julian Meçaj dhe Ariol Halilaj, dyshohet se kanë vepruar në formën e një grupi të strukturuar kriminal. Ata akuzohen për kryerjen e veprave penale të vjedhjes në formë të veçantë bashkëpunimi, mbajtjes pa leje të armëve, vrasjes së funksionarëve publikë e mbetur në tentativë, si dhe vrasjes në rrethana të tjera cilësuese, të gjitha të kryera në kuadër të këtij grupi.
Ngjarja ndodhi më 1 nëntor 2019 në mbikalimin e Shkozetit. Arjan Ndoja, bashkë me Aleksandër Lahon (njohur si Rrumi i Shijakut) dhe Andi Malokun, ishin nisur nga Durrësi drejt Tiranës pas një dreke në zonën e plazhit. Ata u qëlluan me armë zjarri nga një automjet Benz në lëvizje, ku dyshohet se ndodhej Redjan Rraja. Për pasojë, Andi Maloku mbeti i vrarë dy ditë më vonë në Spitalin e Traumës në Tiranë, ndërsa Arjan Ndoja dhe Aleksandër Laho u plagosën.
Në të njëjtën çështje penale janë të përfshirë edhe të pandehurit Endrit Sinani, Genti Nderjaku, Bashkim Haxhia dhe Julian Pjetri. Hetimet e SPAK-ut kanë identifikuar rolet e tyre në këtë grup kriminal.