Gjykata Kushtetuese e Kosovës ka shpallur të papranueshme kërkesën e presidentes Vjosa Osmani në lidhje me emërimin e anëtarëve të Komisionit Qendror të Zgjedhjeve (KQZ). Vendimi u mor më 30 mars 2026.
Osmani i është drejtuar Gjykatës për të vlerësuar "konfliktin në mes të kompetencave kushtetuese sipas nenit 113 të Kushtetutës", sa i përket emërimit të anëtarëve të KQZ-së midis saj dhe "grupeve parlamentare si trupa të Kuvendit të Kosovës".
Gjykata konstatoi se nuk janë plotësuar kriteret kushtetuese për ngritjen e këtij konflikti. Në rastin konkret, konflikti është ngritur bazuar në një kompetencë të presidentes që nuk përcaktohet me Kushtetutë, por me Ligjin për zgjedhjet e përgjithshme, konkretisht paragrafin 6 të nenit 61.
Gjykata theksoi se Kushtetuta, në pjesën që trajton format e qeverisjes dhe ndarjen e pushtetit, nuk përcakton specifikisht se presidenti i Kosovës ka kompetencën për të emëruar anëtarët e KQZ-së.
Në vendim thuhet: "Në vlerësimin e Gjykatës në rrethanat e rastit konkret, presidentja e Republikës, ndonëse është palë e autorizuar që të ngritë çështje të konfliktit të kompetencave kushtetuese në mes të saj dhe Kuvendit, nuk ka ngritur para Gjykatës konflikt të ‘kompetencave kushtetuese’, si dhe për pasojë, Gjykata shpall kërkesën e presidentes së Republikës së Kosovës të papranueshme".
Ditë më parë, më 27 mars, u betuan 9 anëtarë të rinj të KQZ-së. Për të kompletuar përbërjen kushtetuese prej 11 anëtarësh, mbetet një anëtar për t’u emëruar nga subjekti tjetër politik me të drejtë nominimi. Lëvizja Vetëvendosje në pushtet ka kërkuar 3 anëtarë, ndërsa Partia Demokratike në opozitë ka kërkuar 2.
Eugen Cakolli nga Instituti Demokratik i Kosovës komentoi se ky vendim pritej, duke kujtuar aktgjykimet e mëparshme të Gjykatës për përbërjen e KQZ-së. Ai u bën thirrje presidentes të përmbyllë sa më parë emërimin e anëtarit të mbetur.