Gjykata Rajonale e Grazit ka shpallur vendimin për gjashtë persona të përfshirë në një incident të dhunshëm të ndodhur gjatë muajit shkurt në një pikë karburanti në lagjen Lend. Konflikti, në të cilin morën pjesë tre shtetas nga Kosova dhe tre shtetas nga Siria, të moshave 21 deri në 28 vjeç, dyshohet se erdhi si pasojë e një mosmarrëveshjeje lidhur me një grua.
Sipas provave të paraqitura nga kamerat e sigurisë, përleshja u përshkallëzua me përdorimin e mjeteve të forta, si shkopinj bejsbolli dhe bokse hekuri. Në një moment, njëri nga të akuzuarit sirianë përdori automjetin e tij për t'iu afruar njërit prej shtetasve kosovarë, i cili arriti t'i shmangej goditjes. Për pasojë, një prej të përfshirëve pësoi frakturë në zgavrën e syrit dhe, sipas avokatëve, rrezikon të humbasë shikimin.
Gjykatësi Andreas Lenz e cilësoi sjelljen e të akuzuarve si të rrezikshme, duke nënvizuar se prania e qytetarëve dhe familjeve me fëmijë në vendngjarje e rëndon situatën. Prokurorja Julia Steiner i akuzoi të pandehurit për pjesëmarrje në përleshje, ndërsa ndaj autorëve kryesorë rënduan edhe akuzat për detyrim dhe tentativë për shkaktim të lëndimeve të rënda trupore. Të gjashtë personat e përfshirë në konflikt rezultojnë të kenë precedentë të mëparshëm penalë.