Gjykata Themelore në Prishtinë i ka shpallur fajtorë dhe i ka dënuar me burgim dy ish-pjesëtarë të forcave policore dhe ushtarake të Serbisë për krime lufte në Kosovë gjatë luftës së viteve 1998-1999. Vendimi u mor në një seancë të mërkurën, më 18 mars 2026.
Zoran Kostiq u dënua me 15 vjet burgim, ndërsa Dragan Miloviq me 7 vjet burgim. Gjykata njoftoi se në dënim do t’u llogaritet koha e kaluar në paraburgim. Të dënuarit kanë të drejtë të ankojnë në Gjykatën e Apelit të Kosovës.
Sipas aktakuzës së ngritur më 16 maj 2024, Kostiq, si pjesëtar i forcave policore serbe i armatosur dhe në uniformë, mori pjesë drejtpërdrejt në krime kundër civilëve shqiptarë ndaj familjes Ujkani në një sulm të organizuar në shtëpinë e tyre në Reznik të Vushtrrisë në maj 1999. Ai u përfshi edhe në plaçkitjen dhe djegien e shtëpive si dhe vrasjen e civilëve të paarmatosur në atë fshat, ku u vranë 8 persona, kryesisht nga familja Ujkani. Gjithashtu, urdhëroi dëbimin e popullatës shqiptare nga shtëpitë.
Miloviq u dënua për maltretimin, torturimin dhe rrahjen e civilëve shqiptarë, kur forcat serbe grumbulluan rreth 20.000 banorë civilë të Vushtrrisë tek varrezat e qytetit në 1999. Sipas aktakuzës, ai bashkë me policë serbë të armatosur ndau popullatën, i detyroi të vendosnin duart e lidhura pas kokës dhe të bien me gjunjë në tokë, duke i goditur me bastunë hekurt, shkopinj druri dhe kontakte armësh.
Gjatë luftës në Kosovë u vranë më shumë se 13.000 civilë, ndërsa mijëra të tjerë u zhdukën. Më shumë se 1.500 persona vazhdojnë të jenë të pagjetur, pjesa më e madhe shqiptarë.
Tensionet në kufi
Në të njëjtën ditë, ushtria serbe zhvilloi stërvitje me helikopterë dhe parashutistë pranë kufirit me Kosovën, në Breznicë, Muhovic dhe Karaqevë. Policia kufitare e Kosovës e vlerësoi aktivitetin si të pazakontë. Kryetari i Komunës së Gjilanit Alban Hyseni dhe kryetari i Këshillit Kombëtar Shqiptar në Luginën e Preshevës Enkel Rexhepi shprehën shqetësim për provokimet dhe ndikimin në sigurinë e qytetarëve.