Prokurorët e Prokurorisë Speciale të Kosovës kërkuan të dielën dërgimin në paraburgim të A.D., ish-pjesëtar i Ministrisë së Punëve të Brendshme të Serbisë (MUP), i arrestuar një ditë më parë nën dyshimin për krime lufte kundër popullsisë civile gjatë luftës në Kosovë të viteve 1998-1999.
Gjykata Themelore në Prishtinë pritet të vendosë për këtë kërkesë. I dyshuari, i identifikuar me inicialet A.D., ishte pjesëtar i MUP-it serb në Ferizaj dhe polic i trafikut në regjionin e Kaçanikut në kohën e dyshuar.
Sipas njoftimit të Prokurorisë Speciale, më 9 mars 1999, në shatin Ivajë dhe fshatrat përreth, ai dyshohet se në bashkëkryerje me persona të tjerë të forcave policore e ushtarake serbe, gjatë një aksioni të organizuar kundër popullsisë civile shqiptare, i detyroi banorët të largohen nga shtëpitë, të cilat më pas u dogjën dhe u shkatërruan.
Gjithashtu, ai dyshohet për rrahje dhe torturë brutale, çnjerëzore, fizike e psikike ndaj 13 civilëve, duke shkaktuar lëndime të rënda trupore gjatë marrjes në pyetje në stacionin policor të Kaçanikut. Këta civilë ishin në mesin e 91 meshkujve të ndarë nga rreth 400 burra, gra, pleq e fëmijë të grumbulluar për t’u dërguar në stacion.
Arrestimi nxiti reagim nga Zyra për Kosovën në Qeverinë e Serbisë, e cila e cilësoi ndalimin si të nxitur politikisht. "Prishtina vazhdon të përndjekë popullin serb nga Kosova, siç dëshmohet nga arrestimi i A.D., polic në pension nga fshati Grnçarë në rajonin e Pomoravës së Kosovës, 26 vjet pas konfliktit", thuhet në reagimin e tyre.