Me urdhër të Prokurorisë Speciale të Republikës së Kosovës, autoritetet policore kanë vënë në pranga dy shtetas, të identifikuar si Momir Jakshiq dhe Miljko Bishevac, nën dyshimin se kanë kryer veprën penale "Krime lufte kundër popullatës civile". Arrestimi i tyre është realizuar në kuadër të hetimeve për ngjarjet e periudhës së luftës së vitit 1999 në rajonin e Mitrovicës.
Sipas informacioneve të bëra publike nga Drejtoria për Hetimin e Krimeve të Luftës, rasti lidhet me masakrën e ndodhur më 19 prill 1999 në vendin e quajtur Kalludër e Vogël, në komunën e Zubin Potokut. Hetimet tregojnë se një grup civilësh shqiptarë, të cilët ishin duke udhëtuar në drejtim të Malit të Zi, janë ndaluar nga të dyshuarit. Sipas dyshimeve, pas plaçkitjes së sendeve me vlerë dhe parave, 23 civilë janë ekzekutuar, ndërsa trupat e tyre janë varrosur pranë një lumi në atë zonë.
Ndaj të dyshuarve është caktuar masa e ndalimit prej 48 orësh. Vepra penale është sanksionuar me nenin 142, lidhur me nenin 22 të Kodit Penal të Republikës Socialiste Federative të Jugosllavisë (RSFJ). Prokuroria Speciale ka bërë të ditur se hetimet për zbardhjen e plotë të kësaj ngjarjeje janë në vazhdim, duke theksuar se në këtë fazë nuk do të ofrohen hollësi të tjera për të mos cenuar integritetin e procedurës penale.
Përditësime
Policia e Kosovës dhe Instituti i Mjekësisë Ligjore kanë nisur sot gërmimet në fshatin Kalludër e Vogël për gjetjen e mbetjeve mortore, në kuadër të hetimeve për krime lufte në Zubin Potok. Zëdhënësja e Prokurorisë Speciale konfirmoi se ekziston urdhri për zhvarrosje dhe autopsi, duke sqaruar se rrëmbimi i viktimave ka ndodhur më 23 prill 1999, e jo më 19 prill, siç ishte raportuar fillimisht. Ndërkohë, Lista Serbe dhe Zyra për Kosovën në Qeverinë e Serbisë e kanë cilësuar arrestimin e dy të dyshuarve si presion politik.
Lista Serbe i ka cilësuar arrestimet e M.J. dhe M.B. si përpjekje për frikësimin e popullatës lokale, ndërsa Zyra për Kosovën në Qeverinë e Serbisë i ka karakterizuar veprimet e Prokurorisë Speciale të Kosovës si hakmarrëse. Nga ana tjetër, Prokuroria Speciale ka konfirmuar se të arrestuarit po hetohen për dyshime të bazuara mbi përfshirjen në krime lufte në Zubin Potok.
Hetuesit kanë identifikuar rolet e dy të dyshuarve për krime lufte në Zubin Potok: Momir Jakšić, i dyshuar si komandant i 'Mbrojtjes Territoriale', dhe Miljko Biševac, pjesëtar i këtij formacioni. Viktima të ekzekutimit dyshohet se janë anëtarë të 'Grupit të Intelektualëve' nga Mitrovica. Gjatë gërmimeve, Njësia e Komisionit Qeveritar për Persona të Zhdukur ka gjetur mbetje kockore dhe prova materiale, të cilat do t'i nënshtrohen ekspertizës mjekoligjore.
Ministri i Punëve të Brendshme, Xhelal Sveçla, ka vizituar të martën lokacionin e gërmimeve në Kalludër të Vogël, ku ka konfirmuar se mbetjet mortore të gjetura u përkasin intelektualëve të zhdukur nga Mitrovica. Duke akuzuar autoritetet e Serbisë për sabotim të procesit të zbardhjes së fatit të personave të pagjetur, Sveçla theksoi se Qeveria e Kosovës mbetet e përkushtuar për gjetjen e të gjithë të zhdukurve nga lufta.
Prokuroria Speciale e Republikës së Kosovës (PSRK) ka kërkuar caktimin e masës së paraburgimit për Momir Jakšić dhe Miljko Biševac, të dyshuar për krime lufte në Zubin Potok. Zëdhënësja e PSRK-së, Arbnora Luta, konfirmoi se kjo masë është kërkuar për të siguruar praninë e të dyshuarve gjatë procesit hetimor. Në lidhje me gjetjen e mbetjeve mortore në këtë zonë, kryeministri Albin Kurti deklaroi se zbardhja e rastit është një hap thelbësor për vënien e drejtësisë për viktimat e luftës.
Kryetari i Skenderajt, Sami Lushtaku, vizitoi sot lokacionin e gërmimeve në Kalludër të Vogël, Zubin Potok, ku po zhvillohen hetimet për krime lufte. Me këtë rast, Lushtaku mbështeti vazhdimin e hetimeve dhe procedimin ligjor ndaj të dyshuarve, pas arrestimit të dy personave në këtë zonë.
Gjykata Themelore në Prishtinë ka caktuar masën e paraburgimit prej një muaji për dy të dyshuarit për krime lufte në Zubin Potok. Institucionet e sigurisë kanë bërë të ditur se hetimet lidhur me viktimat e gjetura në Kalludër po përqendrohen te fati i 23 intelektualëve të Mitrovicës, të rrëmbyer më 19 prill 1999. Ky vendim pason masën fillestare të ndalimit 48-orësh.
Hetuesit e Prokurorisë Speciale, me urdhër të Gjykatës Themelore, kanë bastisur sot pronën e të dyshuarit Momir Jakšić në Zubin Potok. Gjatë operacionit janë sekuestruar prova materiale, përfshirë dokumentacion që vërteton pjesëmarrjen aktive të M.J. në radhët e ish-Ushtrisë Jugosllave gjatë luftës.