Policia e Kosovës, përmes Drejtorisë për Hetimin e Krimeve të Luftës, ka arrestuar më 14 prill 2026 një mashkull, shtetas kosovar me nacionalitet serb, në fshatin Soqanicë të Leposaviqit. Ai dyshohet për kryerjen e veprës penale "Krime lufte kundër popullatës civile".
Sipas hetimeve paraprake, i dyshuari ka qenë pjesëtar i MUP-it të Serbisë gjatë luftës në Kosovë dhe i angazhuar në Stacionin Policor të Skenderajt. Në mars 1999, së bashku me pjesëtarë të tjerë të organizuar në grup, dyshohet se ka marrë pjesë në një operacion policor-ushtarak në Skenderaj.
Gjatë këtij operacioni, i dyshuari i uniformuar dhe i armatosur dyshohet se ka ndihmuar në dëbimin me dhunë të civilëve shqiptarë nga pronat e tyre, si dhe në rrahjen, torturimin dhe plagosjen e tyre. Si pasojë, kanë humbur jetën 15 civilë shqiptarë, ndërsa 16 të tjerë janë zhdukur në dy lokacione të ndryshme në Skenderaj.
I dyshuari është intervistuar në prani të avokatit mbrojtës. Me vendim të prokurorit të rastit, ndaj tij është caktuar masa e ndalimit për 48 orë. Hetimet vazhdojnë.
Sipas një burimi, i arrestuari identifikohet si D.P..