Gjykata Supreme e Kosovës ka vendosur uljen e dënimit për Edmond Lajçin, i cili më parë ishte dënuar me burgim të përjetshëm për vrasjen e bashkëshortes së tij. Me vendimin e ri, dënimi për të pandehurin është caktuar në 30 vjet burg.
Në arsyetimin e saj, Gjykata Supreme theksoi se gjykatat e shkallës së parë dhe të dytë nuk kanë zbatuar drejt nenin 41 të Kodit Penal. Sipas institucionit, një pjesë e rrethanave të konsideruara si rënduese nuk kanë pasur mbështetje në prova, ndërsa të tjera përbëjnë elemente të vetë veprës penale, duke mos justifikuar kështu dënimin maksimal.
Sipas Gjykatës, burgimi i përjetshëm duhet të rezervohet vetëm për raste me rrethana veçanërisht rënduese, të cilat e dallojnë rastin nga ato të zakonshmet. Vendimi është bazuar në parimin e proporcionalitetit dhe individualizimit të dënimit, duke iu referuar praktikës së Gjykatës Evropiane për të Drejtat e Njeriut. Një faktor në zbutjen e dënimit ka qenë edhe pranimi i fajësisë nga i dënuari.
Ky vendim vjen katër muaj pasi e njëjta gjykatë la në fuqi dënimin me burgim të përjetshëm për Dardan Krivaqen, lidhur me vrasjen e të dashurës së tij. Avokati Yll Zekaj ka kërkuar që gjyqtarët të bëjnë një analizë të thelluar në këto raste, duke shmangur ndikimet e jashtme në vendimmarrje.