Gjykata Supreme e Kosovës ka vendosur që të ndryshojë masën e dënimit për Edmond Lajqin, duke e reduktuar atë nga burgimi i përjetshëm në 30 vjet burgim. Ky vendim erdhi pas shqyrtimit të ankesës së mbrojtjes dhe përgjigjes së palës së dëmtuar, duke aprovuar pjesërisht ankesën për aktgjykimet e mëparshme të Gjykatës Themelore në Pejë dhe Gjykatës së Apelit.
Në njoftimin e saj, Gjykata Supreme theksoi se gjykatat e instancave më të ulëta kishin vërtetuar drejt fajësinë dhe cilësimin juridik të veprave penale, përfshirë vrasjen e rëndë dhe armëmbajtjen pa leje. Megjithatë, u konstatua se dënimi me burgim të përjetshëm nuk ishte arsyetuar konform standardeve ligjore dhe nenit 41 të Kodit Penal.
Sipas vlerësimit të Supremes, disa prej rrethanave të konsideruara si veçanërisht rënduese nuk gjenin mbështetje të mjaftueshme në prova, ndërsa të tjera përbënin elemente thelbësore të vetë veprës penale dhe nuk mund të shërbenin si bazë për dënim maksimal. Gjykata theksoi se burgimi i përjetshëm mund të shqiptohet vetëm në raste kur ekzistojnë rrethana që e dallojnë qartë rastin nga veprat e zakonshme të së njëjtës natyrë.
Duke u mbështetur në parimet e individualizimit dhe proporcionalitetit, si dhe në praktikën e Gjykatës Evropiane për të Drejtat e Njeriut, Gjykata Supreme vlerësoi se 30 vjet burgim është masa e përshtatshme që realizon qëllimin e ndëshkimit dhe parandalimit të veprave të tilla.