Gjykata Themelore në Ferizaj, Departamenti i Përgjithshëm – Divizioni Penal, ka vendosur masën e paraburgimit prej një muaji ndaj reperit Betim Januzi, i njohur si Buta (inicialet B.J.), dhe të pandehurit E.H.. Vendimi u mor më 13 prill 2026, pas shqyrtimit të kërkesës së Prokurorisë Themelore në Ferizaj dhe mbajtjes së seancës dëgjimore nga gjyqtarja e procedurës paraprake Alba Makolli.
Ngjarja ndodhi më 11 prill 2026, rreth orës 20:15, në një rrugë në Ferizaj, saktësisht në parkingun afër lokalit E.. Pas një fjalosjeje të çastit, E.H. i është drejtuar B.J.-së me fjalët "ku je o B. mangupi", e ka sulmuar me thikë duke e goditur me dorezë në nofullën e majtë, ka tentuar ta godasë në kokë, ndërsa B.J. është mbrojtur duke prerë dorën dhe ka pësuar lëndime në krahun e majtë. Lëndimet konfirmohen me raport mjekësor.
Gjatë përleshjes, B.J. ka nxjerrë nga çanta një pistoletë të llojit VD-9 4.0, ka shkrepur dy herë në drejtim të tokës dhe pistoleta ka rënë në tokë, duke shkaktuar rrezik për jetën dhe pasurinë e personave përreth.
Gjykata ka vlerësuar ekzistencën e dyshimit të bazuar për kryerjen e veprave penale:
- Ndaj E.H.: Lëndimi i rëndë trupor nga neni 186 paragrafi 1 të Kodit Penal të Republikës së Kosovës.
- Ndaj B.J.: Shkaktimi i rrezikut të përgjithshëm nga neni 356 paragrafi 1 dhe mbajtja në pronësi, kontroll ose posedim të paautorizuar të armëve nga neni 366 paragrafi 1.
Masa e paraburgimit u miratua si e nevojshme për zhvillimin e papenguar të procedurës penale. Palët janë njoftuar për mundësinë e ankesës.