Gjykata Themelore në Mitrovicë, Departamenti i Përgjithshëm – Divizioni Penal, me gjyqtaren e vetme gjykuese Shqipe Sejdiu, ka shpallur më 3 shkurt 2026 aktgjykimin ndaj të pandehurit M.F., duke e dënuar me dy vjet burgim për veprën penale "Kanosja" sipas nenit 181 paragrafi 2, lidhur me paragrafin 4 të Kodit Penal të Republikës së Kosovës.
Aktgjykimi u shpall përmes videoincizimit, pasi M.F. ndodhet në Qendrën e Paraburgimit në Mitrovicë. Ai gjendet në paraburgim që nga 3 qershor 2024, koha e së cilës do t’i llogaritet në vuajtjen e dënimit. Masa e paraburgimit vazhdon deri në plotfuqishmërinë e aktgjykimit.
Ngjarja ka ndodhur më 3 qershor 2024 në banesën e përbashkët familjare në Mitrovicë. Të pandehuri, nën ndikimin e alkoolit, ka kanosur seriozisht vajzën e tij, e cilësuar si viktimë e ndjeshme, duke i shkaktuar frikë dhe ankth për jetën dhe sigurinë e saj. Në të njëjtën datë, kohë dhe vend, ai ka kanosur edhe bashkëshorten e tij përmes fjalëve dhe veprimeve kërcënuese, duke i shkaktuar frikë dhe pasiguri për jetën.
Gjykata ka vlerësuar se veprimet përbëjnë cenim serioz të sigurisë personale, veçanërisht në rrethina të dhunës në familje. Vendimi bazohet në aktakuzën e Prokurorisë Themelore në Mitrovicë të datës 5 gusht 2024.
Palët kanë të drejtë ankese në Gjykatën e Apelit të Kosovës brenda 30 ditësh nga pranimi i aktgjykimit me shkrim.