Raporti i sigurisë, i realizuar nga Drejtoria për Siguri dhe Emergjenca në shkollat e Prishtinës, ka treguar se rreth 50% e tyre kanë çështje ku duhet të intervenohet.
Kryetari i Komunës së Prishtinës, Përparim Rama, ka ftuar në takim drejtorët e të gjitha shkollave të kryeqytetit, së bashku me përfaqësues të Policisë së Kosovës, zjarrfikësit dhe drejtorët e Arsimit, Inspeksionit, Investimeve Kapitale, Transformimit, Mobilitetit, Shërbimeve Publike, si dhe Sigurisë dhe Emergjencave.
Qëllimi i këtij takimi është shqyrtimi në detaje i raportit dhe identifikimi menjëhershëm i hapave konkretë që duhen ndërmarrë. Çdo drejtori do të marrë përgjegjësitë sipas fushës së saj, ndërsa një pjesë e masave do të adresohen nga vetë menaxhmentet e shkollave.
Përparim Rama deklaroi: «Siguria në shkolla është një përgjegjësi e përbashkët institucionale dhe shoqërore. Zero kompromis kur është fjala për sigurinë e fëmijëve tanë».