Gledis Nano, ish-drejtor i Përgjithshëm i Policisë së Shtetit, reagoi në emisionin Studio 24 të News 24 për zhvillimet në lidhje me largimin e drejtorit aktual Ilir Proda, pas protestës së opozitës më 28 shkurt në Tiranë.
Sipas Nanos, nuk ka dalë ende një akt apo vendim zyrtar për shkarkimin e Prodës. "Me sa kam dijeni, do të largohet me dorëheqje. Në qoftë se krijohet një situatë ku nuk mund të vazhdohet më bashkëpunimi, atëherë është vendimmarrja e kryeministrit", tha ai.
Nano theksoi se është krijuar një praktikë e përsëritur e largimit të drejtuesve të lartë pa përfunduar mandatin. Kjo, sipas tij, ndikon në motivimin e strukturave drejtuese dhe punonjësve të policisë. "Nuk po e mbaron dot kush mandatin dhe kjo ka krijuar pasiguri", u shpreh ai, duke shtuar se Proda u zgjodh me konkurs.
Sa i përket menaxhimit të protestës, Nano vlerësoi se policia kishte parashikuar skenarët bazuar në informacionet operative. Kordoni u vendos pranë Drejtorisë së Përgjithshme. Megjithatë, në zonën e Bllokut ndodhi një lëvizje e paparashikuar për të cilën nuk kishte informacion të mjaftueshëm paraprak. Kur turma drejtoi drejt rrugës që kalon pranë Vilës 31, ndodhi incidenti, pavarësisht kërkesës për afrim forcash. "Turma e acaruar kryen veprime të tilla", tha Nano, duke mos promovuar dhunën.