Pas një hetimi disa-mujor të koordinuar ndërkombëtarisht, policia greke shpërbëri një organizatë kriminale që trafikonte lëndë narkotike nga Shqipëria drejt Turqisë, duke përdorur territorin grek si tranzit. Operacioni u zhvillua në orët e para të së premtes, më 14 gusht 2026, në një zonë të Selanikut, ku forcat e rendit ndërhynë në një mjedis të mbyllur.
Sipas njoftimit të autoriteteve, organizata përdorte kamionë të transportit ndërkombëtar, duke e fshehur drogën në vendstrehime të projektuara posaçërisht brenda 8 paletave me letër për riciklim. Gjatë këtij aksioni u sekuestruan në total 324 kilogramë e 474 gramë marijuanë, një gjysmërimorkio, dy makina private, pajisje celulare dhe një sasi prej 1,165 eurosh. Përfitimi financiar i pritshëm nga ky aktivitet vlerësohet të tejkalojë shumën e 700,000 eurove.
Në kuadër të operacionit u arrestuan dy shtetas, përkatësisht 43 dhe 58 vjeç, ndërsa një person i tretë është identifikuar dhe është shpallur në kërkim. Sipas hetimeve, i dyshuari në kërkim koordinonte veprimet për fshehjen e drogës dhe kontaktet me shoferët, ndërsa të arrestuarit e tjerë kishin role të ndara në transport dhe marrjen e narkotikëve nga Shqipëria. Prokuroria Publike për Ndjekjen e Krimit të Organizuar dhe Korrupsionit në Maqedoninë e Veriut njoftoi gjithashtu se ka zhvilluar bastisje në disa lokacione në territorin e saj për të mbledhur prova shtesë dhe për të zbuluar bashkëpunëtorë të tjerë të mundshëm.
Përditësime
Hetimet e mëtejshme në vendngjarje zbardhën detaje të reja mbi logjistikën e grupit kriminal. Autoritetet greke sekuestruan 11 valixhe boshe, të cilat dyshohet se do të përdoreshin për fragmentimin e ngarkesës së drogës. Për më tepër, policia gjeti një targë automjeti të huaj në vendin e operacionit. Hetuesit konfirmuan se tetë paletat me lëndë narkotike ishin pozicionuar në mënyrë të ndarë: katër prej tyre brenda gjysmërimorkios dhe katër të tjera menjëherë pranë saj.
Prokuroria Speciale e Republikës së Kosovës konfirmoi se njëri prej dy shtetasve të arrestuar në Selanik gjatë operacionit të 14 gushtit është shtetasi kosovar me inicialet A.G. Ky arrestim është rezultat i një operacioni disamujor të bashkëpunimit ndërkombëtar midis autoriteteve ligjzbatuese të disa vendeve të rajonit për shkatërrimin e rrjetit të trafikut të lëndëve narkotike.
Policia e Kosovës konfirmoi zyrtarisht se droga kishte si destinacion përfundimtar Turqinë. Operacioni, i koduar 'ORIENTI', ka shtrirë tashmë veprimet hetimore dhe procedurale edhe brenda territorit të Kosovës. Autoritetet po ndërmarrin bastisje dhe verifikime të mëtejshme në lidhje me këtë rast.
Prokuroria Speciale e Kosovës konfirmoi se arrestimi i shtetasit A.G. erdhi si rezultat i një hetimi intensiv disamujor të zhvilluar në bashkëpunim të ngushtë me autoritetet e Maqedonisë së Veriut dhe Greqisë. Hetimet gjithashtu identifikuan personin e dytë të arrestuar si shtetas të Maqedonisë së Veriut.