Ministri i Drejtësisë, Toni Gogu, propozoi katër masa për forcimin e garancive procedurale për të miturit që vijnë në kontakt me organet ligjzbatuese. Propozimet u paraqitën në një tryezë të Këshillit Kombëtar për të Drejtat dhe Mbrojtjen e Fëmijëve, ku u diskutua edhe nevoja për një plan të përbashkët veprimi mes institucioneve, shoqërisë civile dhe partnerëve ndërkombëtarë.
Masat përfshijnë hartimin e një formulari të të drejtave, të shkruar në gjuhë të kuptueshme për fëmijët dhe që u jepet para marrjes në pyetje; garantimin e një avokati pa vonesë për të miturin që merret në pyetje, në përputhje me ligjin; njoftimin e hershëm të punonjësit për mbrojtjen e fëmijës; si dhe krijimin e të dhënave të përbashkëta ndërinstitucionale për zbatimin e këtyre garancive.
Gogu i paraqiti propozimet si pjesë të qasjes së qeverisë ndaj situatave të dhunës të javëve të fundit. Ai tha se përgjegjësia për veprimet e kryera duhet të shoqërohet me mbrojtjen e të drejtave të fëmijëve. “Protesta paqësore mbrohet. Dhuna ka përgjegjësi. Në këtë përgjigje, Ministria e Drejtësisë mban një pjesë të veçantë: fëmijën”, u shpreh ministri.
Projektstrategjia Ndërsektoriale e Drejtësisë për të Miturit për vitet 2027–2030, e hartuar me asistencën teknike të UNICEF-it, është në konsultim publik deri më 22 nëntor. Gogu propozoi që në proces të përfshihen edhe vetë fëmijët, duke e lidhur nismën me 20 nëntorin, Ditën Botërore të të Drejtave të Fëmijës.
Ministria e Drejtësisë po punon për transformimin e institutit për të miturit drejt një modeli që vë në qendër arsimin, rehabilitimin dhe rikthimin e tyre në familje. Në bashkëpunim me Ministrinë e Arsimit, Ministrinë e Brendshme dhe Ministrinë e Shëndetësisë dhe Mbrojtjes Sociale, po hartohen plane për parandalimin e dhunës dhe të situatave të rrezikshme në shkolla.
Gogu tha se shërbimet dhe mbrojtja ligjore duhet të jenë të arritshme për çdo fëmijë, pavarësisht kushteve familjare ose ekonomike. Ai e lidhi këtë qasje me nismën e Ministrisë për drejtësinë sociale dhe tha se drejtësia duhet të arrijë edhe te fëmijët, familjet e të cilëve nuk kanë avokat ose nuk dinë ku të kërkojnë ndihmë.
Sipas ministrit, sistemi duhet të synojë edukimin dhe rehabilitimin e të miturit, në mënyrë që ai të ketë mundësi të ndërtojë një të ardhme larg shkeljeve të ligjit. “Fëmija që ka gabuar duhet të dalë nga takimi me drejtësinë me shkollë, me profesion dhe me familjen pranë, jo me një dosje më shumë”, tha Gogu.