Ministri i Turizmit, Kulturës dhe Sportit, Blendi Gonxhja, njoftoi më 19 prill se punimet në Kalanë e Borshit vijojnë për ta kthyer në një sit i ri muzeal me biletë hyrëse. Ai e konfirmoi këtë përmes një postimi në Facebook, ku ndau pamje nga punimet në fjalë.
Ndërhyrja synon t’i japë jetë të re monumentit historik, duke ruajtur vlerat e tij dhe duke përmirësuar përvojën e vizitorëve. Projekti financohet nga Banka Botërore dhe zbatohet nga Fondi Shqiptar i Zhvillimit, në bashkëpunim me Ministrinë e Turizmit, Kulturës dhe Sportit, IKTK dhe Bashkinë Himarë.
Punimet përfshijnë:
- konservimin dhe stabilizimin e strukturave ekzistuese;
- restaurimin e xhamisë brenda kalasë;
- ndërtimin e elementëve të rinj arkitektonikë;
- vendosjen e paneleve interpretuese;
- krijimin e një platforme vëzhgimi;
- ndriçimin artistik.
Pas përfundimit, kalaja do të hapet për herë të parë si sit muzeal me biletë hyrëse, duke u kthyer në një destinacion të strukturuar turistik, të aksesueshëm sidomos gjatë mbrëmjeve.
Kalaja e Borshit ndodhet në një kodër të gjelbëruar mbi fshatin dhe bregdetin e Borshit, në Rivierën Shqiptare. E ndërtuar në periudhën antike dhe e rindërtuar gjatë periudhave bizantine dhe otomane, ajo ka shërbyer si pikë strategjike për kontrollin e rrugëve tregtare. Muret rrethojnë një sipërfaqe të madhe me rrënoja historike, duke ofruar pamje panoramike mbi detin Jon dhe fushën e Borshit.