Ministri i Kulturës, Blendi Gonxhja, inspektoi punimet restauruese në Kalanë e Borshit, të cilat vijojnë prej disa muajsh. Këto punime synojnë ruajtjen e monumentit dhe garantimin e sigurisë së tij afatgjatë.
Punimet përfshijnë përforcimin e masivit shkëmbor mbi të cilin ngrihet xhamia, stabilizimin e shpatit për sigurinë e vizitorëve dhe ndërhyrje përforcuese në rrugën hyrëse për përmirësimin e aksesit. Një komponent i rëndësishëm është stabilizimi strukturor dhe konservimi i kalasë, me rijetëzimin e mureve dhe bedenave. Po resta urohet edhe xhamia, me ndërhyrje në muraturë, përforcim të elementëve të dëmtuar dhe restaurim të pikturave murale, duke ruajtur autenticitetin dhe vlerat historike.
Gjatë pastrimit të bimësisë dhe largimit të rrënojave, dolën në dritë elementë të rinj historikë, si stera për mbledhjen e ujit të shiut, gjurmë ndërhyrjesh të fillimit të shekullit XX dhe struktura më të hershme. Ministri theksoi se muret perimetrale lidhen me histori deri 2500 vjet më parë dhe se ndërhyrjet historike kanë dëmtuar kalanë. Këto zbulime pasurojnë njohjen e historisë së sitit dhe rrisin potencialin e tij si destinacion kulturor.
Projekti zbatohet me projektim nga Cultural Heritage without Borders Albania, monitorim nga DRTK Vlorë dhe financim nga Banka Botërore përmes Fondit Shqiptar të Zhvillimit, në bashkëpunim me IKTK. Synohet menaxhim i integruar me Bashkinë e Himarës për transport të gjelbër të turistëve, përmirësimin e lagjes poshtë kalasë dhe promovim turistik.