Ka nisur puna zyrtare për transformimin e Kalasë së Elbasanit, një nga zonat më të rëndësishme historike të qytetit. Më 13 janar 2026, u zhvillua takimi i parë i punës për Analizën Fillestare të lagjes “Kala”, ku u diskutuan qasjet strategjike dhe vizionare për rikualifikimin dhe rijetëzimin e kësaj zone unike.
Në fokus të diskutimit ishte koncept-idea e projektimit, e cila do të shërbejë si udhërrëfyes për ndërhyrjet e ardhshme. Ky koncept synon të ruajë autenticitetin historik dhe trashëgiminë kulturore të zonës, duke krijuar mundësi për zhvillim të qëndrueshëm kulturor, turistik dhe ekonomik. Takimi u zhvillua në Ministrinë e Turizmit, Kulturës dhe Sportit, në prani të ministrit Blendi Gonxhja, drejtuesit politik të qarkut Elbasan Arbjan Mazniku, kryetarit të Bashkisë Elbasan Gledian Llatja, si dhe ekspertëve vendas dhe të huaj.
BID Elbasan, në bashkëpunim me Fondacionin Shqiptaro-Amerikan për Zhvillim (AADF), po ndërton një vizion të përbashkët për ta shndërruar lagjen “Kala” në një destinacion referencë. Kjo hapësirë do të bëhet e gjallë dhe funksionale, e lidhur ngushtë me identitetin dhe jetën urbane të qytetit. Projekti pritet të ketë ndikim afatgjatë, duke përmirësuar jetën komunitare dhe duke rritur atraktivitetin turistik të Elbasanit.
Kalaja e Elbasanit është një monument i rëndësishëm i trashëgimisë historike dhe kulturore në Shqipëri. Ajo u ndërtua në vitin 1466 nga Sulltan Mehmeti II, mbi rrënojat e qytetit antik romak Skampis, dhe shërbeu si pikë strategjike mbrojtëse përgjatë rrugës së lashtë Via Egnatia. Brenda mureve të saj ndodhet lagjja “Kala”, një zonë unike e banuar pa ndërprerje ndër breza, ku bashkëjetojnë monumente kulti, shtëpi karakteristike dhe rrugica me kalldrëm.
Ministri Blendi Gonxhja theksoi se ky është një fillim i rëndësishëm për një iniciativë me ndikim të madh në të ardhmen e qytetit. Puna do të vijojë në faza të mirëpërcaktuara deri në finalizimin e projektit, duke vlerësuar bashkëpunimin ndërinstitucional.