Më 11 maj u prezantua projekt-ideja për rivitalizimin e Kalasë së Elbasanit në praninë e Kryeministrit Edi Rama, Ministrit të Turizmit, Kulturës dhe Sportit Blendi Gonxhja, Kryetarit të Bashkisë Gledian Llatja, bashkëdrejtuesve të AADF-së Martin Mata dhe Aleksandër Sarapuli, si dhe drejtuësit politik Arbjan Mazniku.
Projekti, i hartuar nga arkitekti Emre Arolat në bashkëpunim me MVM Architecture, përfaqëson fazën e parë të ndërhyrjeve që synojnë rikthimin e identitetit historik të kalasë, mbrojtjen e vlerave arkeologjike dhe rolin e saj në jetën e qytetit. Ai parashikon restaurimin e zonës historike, përmirësimin e hapësirave publike, zhvillimin e infrastrukturës për vizitorët dhe krijimin e ambienteve multifunksionale për aktivitete kulturore, artistike dhe turistike.
AADF financon hartimin e projektit dhe sjell ekspertizë ndërkombëtare e vendase. Pas prezantimit, pritet rakordimi institucional dhe ndjekja e procedurave deri në miratimin final. Instituti Kombëtar i Trashëgimisë Kulturore, Bashkia Elbasan, Ministria e Turizmit, Kulturës dhe Sportit, AADF dhe FSHZH do të monitorojnë të gjitha fazat e zbatimit.
Kryetari i Bashkisë Gledian Llatja e cilësoi projektin si “një kapitull të ri për Elbasanin”, duke theksuar ruajtjen e autenticitetit historik dhe kontributin në zhvillimin ekonomik të qytetit. Kalaja e Elbasanit është një nga kështjellat më të rëndësishme fushore në Ballkan, me histori që daton nga periudha romake.