Ministri i Turizmit, Kulturës dhe Sportit, Blendi Gonxhja, ka vlerësuar potencialin turistik të zonës së Nikaj-Mërturit, duke e cilësuar atë si një nga thesaret më të vyera të Alpeve Shqiptare dhe një destinacion me mundësi të mëdha për zhvillimin e turizmit malor.
Përmes një postimi në rrjetet sociale, ministri Gonxhja njoftoi se gjatë një takimi të zhvilluar me administratorë të bujtinave, hoteleve dhe guida turistike, janë diskutuar sfidat dhe hapat që duhen ndërmarrë për ta kthyer këtë potencial në një zhvillim të qëndrueshëm.
Sipas ministrit, bashkëpunimi i ngushtë me komunitetin dhe sipërmarrësit lokalë është thelbësor për hartimin e politikave që sigurojnë:
• Mbrojtjen e natyrës dhe mjedisit;
• Promovimin e trashëgimisë kulturore;
• Krijimin e mundësive më të mëdha ekonomike për banorët e zonës.
Gonxhja shtoi se këto masa synojnë ta bëjnë Nikaj-Mërturin një destinacion gjithnjë e më tërheqës për vizitorët vendas dhe të huaj.