Një rast grabitjeje ka ndodhur më 20 qershor 2026, rreth orës 02:50, në një pikë të shitjes së derivateve në rrugën “Ramiz Cernica” në Prishtinë.
Sipas njoftimit zyrtar të Policisë së Kosovës, dy punonjës të pompës kanë raportuar se dy persona të maskuar kanë hyrë në objekt dhe i kanë kanosur ata me armë të ftohtë (thikë). Nën këtë kërcënim, të dyshuarit kanë marrë para të gatshme në vlerë prej 2,539.64 euro dhe janë larguar nga vendngjarja në drejtim të panjohur.
Njësitet përkatëse policore kanë dalë në vendin e ngjarjes dhe kanë iniciuar rastin si “Grabitje”. Aktualisht, hetimet janë duke vijuar për identifikimin dhe kapjen e autorëve të përfshirë në këtë vepër penale.