Ish-i dërguari special i Presidentit Donald Trump për misione speciale të SHBA, Richard Grenell, ka reaguar lidhur me vendimin e fundit të Dhomave të Specializuara të Kosovës në Hagë, i cili parashikon dënime me një total prej 81 vitesh burgim për 4 ish-liderë të UÇK-së. Në një intervistë për emisionin “Top Story”, Grenell shprehu qëndrimin se Kosova nuk ka nevojë për një gjykatë me seli në Holandë që të marrë vendime për fatin e saj apo të popullit të saj.
Sipas Grenell, procesi gjyqësor dhe dënimi i dhënë janë të ndikuar nga motive politike. Ai theksoi se institucionet e Kosovës duhet të kenë kompetencën dhe përgjegjësinë për të vendosur vetë për çështjet që janë të rëndësishme për të ardhmen e shtetit. “Kosova dhe gjykatat e Kosovës duhet të vendosin për të ardhmen e Kosovës dhe për çështjet që janë të rëndësishme. Nuk kemi nevojë për një gjykatë në Holandë që të marrë vendime për Kosovën”, u shpreh ai gjatë intervistës.
Duke bërë një krahasim me qasjen amerikane, ai nënvizoi se SHBA vepron në përputhje me interesat e saj kombëtare dhe këshilloi që e njëjta logjikë duhet të ndiqet edhe nga udhëheqja në Prishtinë. Grenell shtoi se problemi kryesor qëndron te përdorimi i gjykatave që operojnë me vendime të ndikuara politikisht. Ai u bëri thirrje kryeministrit dhe parlamentit që të shqyrtojnë hapat e tyre të mëtejshëm, duke theksuar se gjykatat vendase duhet të trajtojnë vetë këto çështje.
Për më tepër, Grenell kishte sugjeruar një ditë më parë mundësinë e mbylljes së këtij institucioni ndërkombëtar, duke e cilësuar atë si “gjykata radikale”.