Ministria e Punëve të Jashtme e Greqisë ka reaguar zyrtarisht lidhur me incidentet e dhunshme të ndodhura më 30 maj 2026 në Zvërnec, gjatë një proteste të banorëve për të drejtat e pronësisë. Gjatë përplasjeve me rojet private, një shtetas grek mbeti i plagosur.
Në njoftimin e saj, diplomacia greke shpreh shqetësimin e fortë për ngjarjen dhe konfirmon se Ambasada e Greqisë në Tiranë ka ndërmarrë menjëherë veprimet e duhura për t’i ofruar asistencën konsullore dhe mjekësore të dëmtuarit. Athina zyrtare u ka kërkuar autoriteteve shqiptare zbardhjen e plotë të incidentit dhe identifikimin e personave përgjegjës.
Në deklaratë theksohet domosdoshmëria e respektimit të shtetit të së drejtës, mbrojtjes së të drejtave dhe pronave të anëtarëve të Minoritetit Kombëtar Grek, si dhe mbrojtjes së zonave të mbrojtura mjedisore. Athina vlerëson se këto standarde, në përputhje me acquis communautaire të Bashkimit Europian, janë kushte thelbësore për përparimin e Shqipërisë në procesin e integrimit evropian.
Përditësime
Ministria për Evropën dhe Punët e Jashtme e Shqipërisë ka shprehur keqardhje për incidentin në Zvërnec, ku u ushtrua dhunë ndaj protestuesve. Ndërkohë që palët janë në komunikim të vazhdueshëm, Qeveria greke konfirmoi se ka marrë në konsideratë qëndrimin zyrtar të Tiranës lidhur me këtë çështje.