Pas protestave të dhunshme të zhvilluara të shtunën në fshatin Zvërnec të qarkut të Vlorës, Ministria e Jashtme e Greqisë ka kërkuar reagimin e autoriteteve shqiptare për zbardhjen e plotë të ngjarjes. Gjatë këtyre përplasjeve, është raportuar plagosja e një shtetasi grek, për të cilin Ambasada e Greqisë në Tiranë ka ofruar ndihmë konsullore dhe mjekësore.
Athina zyrtare ka shfrytëzuar këtë rast për të ngritur pretendime mbi shtrirjen e minoritetit grek në Shqipëri, duke deklaruar për herë të parë se në Zvërnec jeton një minoritet grek. Përmes një deklarate, shteti grek ka kërkuar respektimin e shtetit të së drejtës, mbrojtjen e të drejtave pronësore dhe ruajtjen e zonave të mbrojtura mjedisore në përputhje me standardet e Bashkimit Evropian.
Në këtë debat është përfshirë edhe eurodeputeti Fredi Beleri, i cili ka depozituar një pyetje zyrtare në Komisionin Evropian. Sipas Belerit, në Zvërnec një kompani private po ndërhyn në prona që ishin konfiskuar nga regjimi komunist në vitet 1960 dhe të cilat ende nuk u janë kthyer pronarëve të ligjshëm.
Në pyetjen e tij drejtuar Brukselit, Beleri kërkon të dijë:
• Nëse janë në dijeni për denoncimet rreth ndërhyrjeve në pronat e pakicave në vendet kandidate.
• Çfarë masash po merren për mbrojtjen e të drejtave themelave themelore të pakicave.
• Nëse përparimi i Shqipërisë drejt integrimit evropian duhet të kushtëzohet nga rezultate konkrete në këto fusha.