Kryetari i grupit parlamentar të Partisë Socialiste, Taulant Balla, i është përgjigjur deklaratave të eurodeputetit Fredi Beleri, i cili përmendi çështjen e Zvërnecit dhe përdori termin "grekët e Epirit të Veriut". Në një reagim përmes rrjeteve sociale, Balla e cilësoi këtë term si një koncept të vdekur dhe të tejkaluar, duke nënvizuar se Zvërneci është pjesë e shtetit shqiptar.
"O zoti eurodeputet Beleri, Zvërneci është në shtetin që quhet Shqipëri. Termi Epiri i Veriut ka vdekur bashkë me çdo ëndërr të njerëzve që përpiqen ta mbajnë gjallë. Prandaj të lutem zbato emërtesat zyrtare që të kërkon Parlamenti Evropian", shkroi Balla.
Sipas Ballës, Shqipëria mbetet e angazhuar për respektimin e shtetit të së drejtës, mbrojtjen e pronës dhe garantimin e të drejtave të pakicave kombëtare, të cilat i cilësoi si detyrime kushtetuese, ligjore dhe evropiane. Ai akuzoi eurodeputetin Beleri për shtrembërim të fakteve dhe historisë për qëllime politike.
Kryetari i grupit parlamentar socialist paralajmëroi se diskutimi mbi këto çështje, përfshirë trajtimin e pakicës greke në Shqipëri, do të vazhdojë muajin e ardhshëm në institucionet e Parlamentit Evropian në Strasburg.