Greqia ka ndërmarrë masa për forcimin e sigurisë në Mesdheun Lindor, duke zhvendosur sistemet e mbrojtjes ajrore Patriot nga ishulli Karpathos në Gjirin e Sudas në Kretë. Zhvendosja, e cila ka nisur gjatë fundjavës, synon rritjen e mbrojtjes së objekteve ushtarake strategjike që shfrytëzohen nga forcat greke, ato amerikane dhe aleatët e NATO-s. Sistemet u larguan nga porti i ishullit herët të dielën përmes një mauneje.
Lëvizja e sistemeve pason shqetësimet rreth sigurisë rajonale. Sipas raportimeve të mediave, kjo masë është ndërmarrë pasi Financial Times bëri të ditur se Irani po shqyrtonte mundësinë e sulmeve ndaj objektivave amerikane në Evropën Juglindore dhe Mesdheun Lindor, në rast se presidenti amerikan Donald Trump rrit presionin ushtarak në Ngushticën e Hormuzit.
Ndërkohë, autoritetet ushtarake greke po shqyrtojnë edhe të ardhmen e një baterie tjetër të sistemit Patriot të dislokuar aktualisht në Arabinë Saudite. Këshilli i Mbrojtjes Kombëtare i Greqisë pritet të marrë një vendim përfundimtar mbi këtë çështje në ditët në vijim, duke vlerësuar opsionet për zgjatjen e dislokimit ose tërheqjen e saj. Gjithashtu, Athina mbetet e gatshme të shqyrtojë një kërkesë të mundshme nga Bullgaria për ndihmë në mbrojtjen ajrore. Sa i përket bazës në Qipro, është konfirmuar se avionët luftarakë grekë F-16 do të vijojnë të mbeten të dislokuar atje. Ministria greke e Mbrojtjes nuk ka dhënë ende një koment zyrtar publik mbi këto raportime për zhvendosjen e sistemit Patriot nga Karpathosi.