Ngjarja ka ndodhur të premten, më 14 gusht 2026, rreth orës 17:00, në rrugën “Shabi Hashani” të fshatit Greme. Sipas autoriteteve, viktima ka qenë duke ecur në rrugë kur u godit nga një predhë që i shkaktoi lëndime të lehta në këmbë. Ajo ka kërkuar ndihmë mjekësore në Spitalin e Përgjithshëm në Ferizaj, nga ku Policia e Kosovës është njoftuar rreth orës 20:50.
Pas hetimeve të kryera nga Njësia e Hetimeve, u identifikua si i dyshuar 23-vjeçari A.H., në shtëpinë e të cilit u gjet dhe u sekuestrua një pushkë gjahu me një fishek. I dyshuari është shoqëruar në Stacionin Policor në Ferizaj, ku është intervistuar në prani të avokatit mbrojtës dhe në konsultim me prokurorin kujdestar.
Ai po hetohet për dy vepra penale:
- “Mbajtje në pronësi, kontroll ose posedim të paautorizuar të armëve”
- “Përdorim të armës apo mjetit të rrezikshëm”
Pas përfundimit të veprimeve hetimore, i riu është liruar në procedurë të rregullt, ndërsa çështja vijon të jetë nën procedim të mëtejshëm.