Paraditen e së premtes, në lumin Drini i Bardhë, në afërsi të Urës së Fshajt në Gjakovë, është gjetur një grua pa shenja jete. Vdekja e viktimës, e cila është identifikuar si grua e moshës madhore, është konstatuar nga personeli mjekësor në vendin e ngjarjes.
Zëdhënësi i Policisë për rajonin e Gjakovës, Sheremet Elezaj, ka bërë të ditur se autoritetet janë njoftuar për rastin rreth orës 11:10. Njësitë përkatëse policore kanë dalë menjëherë në vendin e ngjarjes dhe, në konsultim me Prokurorin e Shtetit, është iniciuar zyrtarisht rasti që po trajtohet si 'Hetim i vdekjes'. Ndërkohë, autoritetet vijojnë hetimet për të zbardhur rrethanat dhe shkaqet që çuan në këtë ngjarje.
Në një deklarim të mëhershëm për mediat, drejtori rajonal i policisë në Gjakovë, Lumni Graishta, kishte njoftuar se njësitet e nevojshme ishin angazhuar për këqyrjen e vendit të ngjarjes. Sipas të dhënave fillestare të bëra të ditura nga Graishta, viktima dyshohej të ishte rreth 50 vjeçe dhe nga këqyrja paraprake nuk ishin vërejtur shenja të dukshme dhune në trupin e saj. Policia gjithashtu kishte verifikuar raportimet për persona të zhdukur gjatë kësaj jave, por deri në ato momente nuk ishte gjetur ndonjë rast që përputhej me viktimën.
Përditësime
Trupi i viktimës i është dërguar Institutit të Mjekësisë Ligjore për ekzaminim. Prokuroria dhe policia janë në pritje të ekspertizës zyrtare për të përcaktuar shkakun e vdekjes.