Një grua e moshës madhore ka ndërruar jetë në Gjakovë pas rënies në ujë nga Ura e Moglicës në rrugën Ymer Pula. Ngjarja ndodhi rreth orës 19:55 të së shtunës.
Rastin e konfirmoi Sheremet Elezaj, toger dhe zëdhënës i Policisë për rajonin e Gjakovës. Ai bëri të ditur se patrullat policore, njësi e zjarrfikësve dhe ekipi i emergjencës mbërritën në vendngjarje, ku viktima ishte nxjerrë tashmë nga uji me shenja jete.
Personeli mjekësor i ofroi ndihmën e parë dhe e dërgoi për trajtim të mëtejshëm në Spitalin e Gjakovës. Rreth orës 21:30, spitali njoftoi se gjendja shëndetësore e viktimës ishte përkeqësuar dhe ajo kishte ndërruar jetë.
Njësitë përkatëse po kryen veprimet hetimore për zbardhjen e plotë të rrethanave të ngjarjes.
Përditësime
Sheremet Elezaj deklaroi se personeli mjekësor i ofroi ndihmën e parë gruas pas rënies dhe e dërgoi për trajtim të mëtejshëm.
Ai u shpreh: "Rreth orës 21:30 jemi njoftuar nga spitali se viktimës i është keqësuar gjendja shëndetësore dhe ka ndërruar jetë".