Një punëtor 29-vjeçar ka humbur jetën rreth orës 17:00 të së enjtes në rrugën Pjetër Bogdani në Gjakovë. Ngjarja ka ndodhur gjatë punimeve në një objekt në ndërtim, ku dyshohet se viktima ka rënë nga skelat në katin 4-5.
Policia e Kosovës është njoftuar menjëherë dhe njësitë përkatëse bashkë me ekipin emergjent mjekësor kanë mbërritur në vendngjarje. Atje është konstatuar se viktima ishte pa shenja jete.
Zyrtarja për informim e Policisë në Gjakovë, Vlera Krasniqi, ka konfirmuar se në vend ka dalë edhe prokurori i shtetit. Një person po intervistohet në cilësinë e të dyshuarit, pasi dyshohet se derisa drejtonte kranin ka lëvizur diçka që ka çuar në rënien e viktimës. Burimet bëjnë të ditur se kjo mund të ketë ndodhur nga pakujdesia.
Hetimet po vazhdojnë për të sqaruar rrethanat e plota të incidentit.
Përditësime
Lendrit Fetahaj, 29-vjeçar nga fshati Skivjan të Gjakovës, humbi jetën rreth orës 16:20 në afërsi të shkollës 'Mehmet Akif' në Gjakovë, pasi u godit nga krahu i kranit gjatë bartjes së materialeve.
- Trupi u dërgua në IML për obduksion.
- Inspektorati i Punës ka nisur hetimet.
- Është incidenti i 9-të fatal në punë këtë vit në Kosovë.
- Ngjarja ndodhi gjatë aksionit 15-ditor kombëtar për siguri në punë, të nisur më 16 prill.