Një konflikt fizik i ndodhur mbrëmjen e së shtunës në rrugën “Ali Ibra” në Gjakovë ka përfunduar me vdekjen e një personi dhe lëndimin e tre të tjerëve. Lajmin e ka konfirmuar zëdhënësja e Policisë së Kosovës për rajonin e Gjakovës, Vlera Krasniqi, e cila bëri me dije se forcat e rendit morën njoftimin për incidentin rreth orës 21:30.
Sipas informacioneve zyrtare, të katër personat e përfshirë në përleshje janë dërguar për trajtim mjekësor në Qendrën Emergjente të Spitalit Rajonal në Gjakovë. Njëri prej tyre ka ndërruar jetë si pasojë e plagëve të rënda, të cilat dyshohet se janë shkaktuar nga përdorimi i një mjeti të mprehtë. Policia ka konfirmuar se mes të lënduarve që po marrin trajtim mjekësor ndodhet edhe personi i dyshuar për kryerjen e këtij akti.
Autoritetet policore, në koordinim me prokurorin e shtetit, kanë nisur veprimet hetimore për zbardhjen e rrethanave të plota të ngjarjes. Si motiv fillestar i përleshjes, sipas Policisë, dyshohet të ketë qenë një zënkë e ndodhur më parë midis fëmijëve të familjeve përkatëse.